New testament in Gullah

Esta traducción al Gullah del Nuevo Testamento ha estado gestandose durante 26 años y finalmente, se ha lanzado al público. Hubo un lanzamiento en el Festival de las Jornadas del Patrimonio en la Isla Santa Elena , el 12 de noviembre de 2005.
1Fo God mek de wol, de Wod been dey. De Wod been dey wid God, an de Wod been God. 2Fo God mek de wol, de Wod been dey wid God. 3Shru dat Wod, God mek ebryting. Ain nottin een de whole wol wa God mek dat been done dout de Wod. 4De Wod, e de one wa all life come fom. An dis life yah de life wa da mek all people see de light. 5De light da shine een de daak, an de daak ain neba been able fa pit out dat light.
6God sen one man fa come eenta de wol, an dat man name been John. 7E come fa tell people bout de light, so dat ebrybody kin bleebe wen dey yeh wa e say. 8John esef ain been de light. E jes come fa tell people bout de light. 9De light wa e taak bout, dat de true light wa come eenta de wol an da shine pon ebrybody.
10So den de Wod been dey een de wol, an shru um God mek all ting een de wol. Stillyet, de people een de wol ain been know who e been. 11E come ta e own place, bot e own people ain wahn hab nottin fa do wid um. 12Stillyet, some bleebe pon um. Ta all dem, e gim de right fa be chullun ob God. 13Dey ain git fa be chullun ob God same way like people een de wol hab chullun. Dey ain chullun ob God cause dat wa somebody wahn, needa cause some man wahn dat fa be. Bot God esef mek um come fa be e chullun.
14De Wod come fa be a man, an e lib mongst we fa a wile. We see de glory God gim, cause e de onliest Son ob de Fada God. An e gii we all de blessin ob God an mek we know wa true bout God.
15John beena tell people bout um. E holla say, “Dis de poson A beena tell oona bout wen A say, e gwine come wen A done done de wok wa God sen me fa do. Bot e great fa true, way mo den me, cause e done been dey fo A bon.”
16Cause e full op wid blessin fa we, e da bless we mo an mo. 17Moses bring we de Law, bot Jedus Christ de one wa bring we God blessin an mek we know wa true. 18Nobody ain neba see God. Bot God onliest Son, e one wid e Fada, an de Son mek people know who God da.

http://www.gullahbible.com/